Solveig Fridriksdottir

Nýtt bloggumhverfi

2006-08-03T19:22:00.000Z

Jæja, það hefur aldeilis breyst umhverfið síðan ég var að blogga hér um árið, þegar ég var í námi hjá Salvöru og hún sá um að við kynntumst og prófuðum ýmsar nýjungar á Netinu.

2003-09-10T14:40:00.000Z

Áfram með lærdóminn
Nú er langt um liðið síðan ég skrifaði í vefdagbókina. Nokkrum áföngum er lokið, Fjarnám og kennsla og Margmiðlun og hugbúnaðarfræði, og nýir að hefja göngu sína. Ekki er til setunnar boðið heldur verður að láta hendur standa fram úr ermum og takast á við ný verkefni af fullum krafti, ef það er einhver eftir að loknum miklum önnum í sumar og nú í haust.

En ekki dugar annað en að vera jákvæður og léttur í lund og vera bjartsýnn á framhaldið.

2003-07-28T10:11:00.000Z

Lærdómssumarið mikla
Nú fer senn að sjást fyrir endann á áfanganum hjá Stefáni Jökulssyni. Aðeins er eftir eitt verkefni og ein stutt ritgerð. Það er ótrúlegt hvað það getur teygst á þessari vinnul. Hjá Láru er aðeins eftir ritgerð en hún þarf reyndar að vera nokkuð löng, eða 10-15 blaðsíður og þá er sá áfangi frá. Þetta kemur allt saman.

2003-07-22T16:31:00.000Z

Sól og sumar!
Mikið skelfing er nú veðrið gott, kannski ég taki bara svona sérstaklega eftir því af því ég þarf að vera að læra svo mikið þessa dagana. Það truflar mig svo sem ekkert sérstaklega nema hvað að ég er að reyna að læra fyrir Íslenskt mál að fornu, mjög fornu, og það er ekki mjög skemmtilegt þegar allt þarf að lærast utan að, mjög forn kennsluaðferð og allt mjög fornt við það. Ég reyni samt að forðast að verða mjög forn við þennan lestur heldur setja allt í skammtímaminnið og þar þarf það að endast fram undir miðjan ágúst. Þá má það leka út og gefa rúm fyrir nýjan lærdóm.

2003-07-12T12:52:00.000Z

Hugbúnaður og margmiðlunarefni

Drottinn minn dýri. Nú er ég búin að eyða tæpum tveimur dögum í að lesa og reyna að skilja hvað skal gera með verkefni 5 - stafrænar frásagnaraðferðir í áfanganum hjá Stefáni Jökulssyni. Þetta var tyrfið lesefni og þurfti ég (ásamt Ólöfu) að verða mér út um aðstoð sérfræðings til að átta mig á hugtökunum. Eftir langa mæðu hafðist þetta og tókst mér að skila verkefninu rétt í þessu. Púff, læt þetta duga í bili.

2003-07-10T10:22:00.000Z

Sæl öll í sumrinu

Nú er ég tekin til við bloggskriftir á ný og ætla að reyna að halda þeim við í sumar og næsta vetur.

Ég hef stundað sumaráfangana Hugbúnaður og margmiðlunarefni hjá Stefáni Jökulssyni og Fjarnám og kennsla hjá Láru Stefánsdóttur. Eins og þið sjáið þá hef ég haft nóg að gera í sumrinu og þannig mun það verða áfram fram í ágúst. En þá er líka mikið frá. Þar sem við Ólöf erum að reyna að ljúka við 30 einingar í haust þá verðum við einnig að ljúka við lokaverkefni upp á 2.5 einingar. Þetta hefur verið í góðum gír og allt undir „kontról“. Vonum að svo verði áfram.

Þrátt fyrir þetta allt saman þá hef ég nú komist með eiginmanninum í ferðir út á landsbyggðina og við haft það verulega gott. Vona að allir hafi það gott og heyri vonandi frá einhverjum samnemendum.

Sumarkveðjur

2003-06-15T13:02:00.000Z

Sumarvinnan :-)
Nú er þessari helgi senn að ljúka og hef ég þurft að nýta hana ansi hreint vel til lærdóms og lesturs og ná að koma frá verkefnum vikunnar. Gengur það nú bara þokkalega og sýnist mér að þetta verði lestrarsumarið mikla. Það er nú svo sem í lagi þegar lestrarefnið er með ágætum og samnemendur í áföngunum við sama heygarðshornið. Vonandi eru nú ekki allir hættir að blogga, kannski bara í sumarfríi.

2003-06-10T11:59:00.000Z

Sumarnám
Nú eru sumaráfangar komnir af stað og lestur hafinn og verkefnavinna. Þetta verður sýnist mér alveg ljómndi, lesið og skrifað og unnið að litlu lokaverkefni fyrir haustið. Læt heyra frá mér öðru hvoru í sólinni.

2003-06-05T11:19:00.000Z

Verkefnalok
Nú er komið að lokum áfangans hjá Salvöru. Ég er loksins búin að ná því að ljúka við verkefnin og er það góð tilfinning. Ég hef bloggað reglulega, reynt að koma inn á hverjum degi og alltaf að minnsta kosti fjórum sinnum í viku svo þetta eru orðnir margir pistar hér.

En nú held ég að ég reyni að taka mér smá frí í nokkra daga og þá um leið frá blogginu. Öllum samnemendum mínum í áfanganum þakka ég góð samskipti og Salvöru einnig.

2003-06-02T01:05:00.000Z

Saumaklúbbur á Hofsósi
Þetta var skemmtileg helgi hjá mér og vinkonum mínum í gamla saumsklúbbnum frá því við vorum saman í Versló. Klúbburinn er orðinn 37 ára gamall (vona að fáir lesi þetta blogg) og við höfum alltaf haldið hópinn. Við skoðuðum Vesturfarasetrið og sýningarnar sem eru í gangi þar. Einnig brugðum við okkur á skak á lítilli trillu. Heilmikið veiddist og er ég kominn með glás af verkuðum þorski í frystinn hjá mér. Við hjónin notuðum einnig tækifærið og smelltum okkur örstutt til Siglufjarðar og stoppuðum á öllum mögulegum stöðum í leiðinni. Á leiðinni í bæinn í dag keyrðum við Hvalfjörðinn og brugðum okkur meira að segja niður að Saurbæjarkirkju og litum þar inn. Steindu hliðargluggarnir hennar Gerðar í kirkjunni eru verulega fallegir. Svo var verulega fallegt að keyra Hvalfjörðinn, lítil sem engin umferð og þægileg keyrsla.

Það hefur sem sagt ekkert verið hægt að vinna í verkefnum þessa helgi en staðbundin lota í Hugbúnaði og margmiðlun hefst á morgun (í dag) og sýnist mér ég kannast við ansi mörg nöfn nemenda þar. Þetta verður tveggja daga lota og svo strax á miðvikudaginn er staðbundin lota í fjarnámi og kennslu hjá Láru. Þetta verða miklar setur. Ekki gott eftir allar seturnar í allan vetur.

Svo er ég nú búin að fá einkunnir úr þeim áföngum sem ég tók próf í í HÍ og gekk svona skrambi vel, er sem sagt hæst ánægð.

2003-05-30T13:19:00.000Z

Uppsetning ritgerða
Vefleiðangri um uppsetningu ritgerða er nú lokið hjá mér ásamt öllum undirsíðum. Það eina sem á vantar er að færa leiðbeiningar um uppsetningu heimilda og meðferð tilvísana yfir á PDF-skjal. Það stendur til bóta þar sem ég fæ vonandi forritið inn á tölvu hjá mér ekki seinna en á mánudag. Lokaverkefnið hjá mér getur haldið áfram næstum endalaust, ég er alltaf að finna eitthvað nýtt sem mér finnst að ætti að vera í leiðbeiningunum. Svo er ég búin að lesa inn á glærurnar fyrir Microsoft Producer og vonandi kemst það upp sem allra fyrst. Annars er örugglega mikið álag á Salvöru þessa dagana þar sem útskrift er í nánd.

Nú um helgina fer ég hins vegar í saumaklúbb norður á Hofsós. Þar á ein meðlimurinn í klúbbnum lítið hús og er alveg tilvalið að bregða sér norður í klúbbinn. Makar okkar ætla flestir að koma og hafa það náðugt svo þetta verður byrjunin á sumarfríinu. Vonandi verður sæmilegt veður þó það skipti í raun engu máli, maður hagar sér bara eftir veðri og vindum. Megi allir eiga góða helgi.

2003-05-27T13:30:00.000Z

Góðir hálsar
Nú hef ég tekið mér smávegis frí að undanförnu en ætla að leggja mig stíft fram á morgun og fimmtudag til að geta lokið við allt fyrir mánaðamótin. Ég er nú byrjuð í áfanga hjá Láru Stefánsdóttur í Fjarnámi og kennslu og er hún nú þegar byrjuð að demba yfir okkur verkefnum til að vinna að. Þetta verður vonandi gagnlegt námskeið.

2003-05-25T21:43:00.000Z

Áfram unnið að lokum
Ágætu lesendur, ef einhverjir eru eftir til þess. Ég er enn að dytta að vefsíðum hjá mér og reyna að ná að ljúka við lokaverkefnið sem við Ólöf vinnum að saman. Þetta potast allt í rétta átt og að lokum mun þetta taka enda.Ég held að skipulag áfanga sé lokið en er enn að bæta við leiðbeiningum við ritgerðirnar. Hafið það sem best

2003-05-23T21:59:00.000Z

Sumaráfangi
Í dag fór ég upp í Kennó til að hitta Sigurjón Mýrdal vegna lesáfanga sem ég ætla að taka nú í sumar. Áttum við gott spjall og reyndum að koma okkur niður á lesefni og fleira sem gott væri að kynna sér varðandi það sem ég ætla að taka fyrir. Þetta verður vonandi skemmtilegt. Svo er byrjaður áfangi hjá Láru og enn annar byrjar von bráðar. Mér sýnist þetta vera all nokkuð hjá mér en þetta eru allt 2.5 eininga áfangar svo það getur nú ekki orðið mjög yfirgripsmikið, eða öllu heldur ætti ekki að vera það. Vona að álagið verði í samræmi við einingafjölda. Veðrið áfram gott og aldeilis hægt að stunda göngur af kappi. Ég las á blogginu hjá Sigríði Guðna að hún væri horfin til Danmerkur, vonandi verður gott veður hjá henni eins og okkur hinum á Fróni.

2003-05-22T23:12:00.000Z

Skipulagning áfanga
Jæja nú hef ég lokið við að útbúa síðu með skipulagi áfanga sem notast við Netið og aðra vefmiðla, hægt er að skoða hana hér. Ég er einnig langt komin með lokaverkefnið, á eftir að setja inn tengingar á nokkrum stöðum og lagfæra myndir sem tengjast inn á sem leiðbeiningar. Svo tók ég mig til og bjó til eina síðu sem myndagallerí þar sem tenging er í nokkur myndaalbúm. Reyni ef til vill að bæta fleirum við fyrir lokin.

Veðrið er náttúrulega búið að vera frábært í dag og vonandi hafa fleiri en ég notað daginn til gönguferða þó fyrri parturinn hafi verið nýttur innandyra við tölvuvinnu.

2003-05-20T22:59:00.000Z

Vinna við lokaverkefni
Áfram held ég að vinna að því að ljúka við lokaverkefnið og er það að taka á sig lokamynd. Á aðeins eftir að snurfusa ýmsar síður tengdar því og virðist það taka sinn tíma. Ég hafði hins vegar alveg gleymt að ljúka við skipulagningu á námskeiði eða lotu sem notar Netið eða aðra vefmiðla og þarf ég að einhenda mér í það á föstudaginn. Annars er allt gott að frétta af mér í náminu og næstu námskeið senn að hefjast.

Veðrið í dag var vel fallið til útivistar og gerði ég það að hluta mér til ánægju og yndisauka.

2003-05-17T22:50:00.000Z

Langur laugardagur
Í dag var ég frá því kl. 9 í morgun niður í Kennó í staðbundinni lotu í áfanganum Margmiðlun til náms og kennslu og því lauk ekki fyrr en kl. 16. Góður dagur þar og voru verkefni samnemenda skoðuð. Mörg mjög skemmtileg margmiðlunarverkefni sem nýtast til kennslu á mismunandi skólastigum. Nú mun ég hvílast vel í kvöld og á morgun og taka svo aftur til við tölvuvinnu.

2003-05-16T17:59:00.000Z

Ágætu samnemendur
Nú skilst mér að námskeiðinu Nám og kennsla á netinu sé við það að ljúka og vonandi flestir búnir að ljúka öllum sínum verkefnum. Óska ég ykkur öllum þá til hamingju með það. Ég hins vegar er ekki búin og er búin að fá frest mér til mikils léttis. Sé fram á að hafa þessa vinnu yfir mér alla næstu viku. Ég er nefnilega líka á Margmiðlunaráfanganum hjá honum Torfa og hef ekki verið nógu dugleg að ljúka verkefnum þar. Mér tókst þó að ljúka við gerð einnar hringmyndar, Panorama, og tókst það bara nokkuð vel. Ótrúlega sniðugt dæmi og skemmtilegt að vinna þetta. Ég set kannski tengil á myndina fyrir ykkur til að leyfa ykkur að skoða. Annars þakka ég samfylgdina þessa önnina.

2003-05-15T16:40:00.000Z

Heil og sæl öll hvar sem þið eruð!
Ég hef tekið því nokkuð rólega í dag í verkefnavinnu. Ég þurfti nú reyndar að fara niður í KHÍ og hitta Karl Jeppesen vegna myndskár sem eru búin að vera vandræði með vegna margmiðlunarverkefnis. Það gekk vel að koma þessu í lag en náðist samt ekki að ljúka því og verður áframhald á því á mánudaginn nk. Það verður staðbundin lota í Margmiðlunaráfanganum næsta laugardag svo ekki næst að ljúka því verki á tilsettum tíma. Þá er það fresturinn sem maður grípur til. Svo var ég að fá póst frá Láru Stefánsdóttur rétt í þessu vegna sumarnámskeiðs sem verður á hennar vegum. Þannig að þetta nær allt saman hjá mér. Hef uppi ráðagerðir um að vinna vel við lokaverkefnið í kvöld og svo hef ég morgundaginn og þætt mér nú best ef ég næ að ljúka þessu fyrir helgina. Þá verður hátíð í bæ.

2003-05-14T14:42:00.000Z

Hvernig er veðrið í dag?
Ég settist við tölvuna kl. 7:15 í morgun og er búin að sitja við sleitulaust síðan. Það líða fjórir klukkutímar og maður veit varla af því. Gleymi næstum því að fá mér að borða. Svo það er ekki nema von að ég spyrji hvernig veðrið sé því ekki hef ég litið út um gluggann hvað þá annað fyrr en núna rétt í þessu. Svei mér þá, venjulegt íslenskt veður! Vonast til að komast langt með verkefnið í dag og á morgun.

2003-05-13T18:41:00.000Z

Áfram setið við og svo kaffisamsæti
Áfram sat ég við í dag við að vinna leiðbeiningar við uppsetningar á ritgerðum og heimildum. Þetta er mun tímafrekara en ég hafði gert ráð fyrir, enda þarf að velta fyrir sér hvernig þær eiga að líta út á vef meira en á pappír. Er nú þegar komin með yfir 40 stundir í þessa vinnu en það er ekki hægt að hætta í miðjum klíðum svo ég held áfram. Þetta þyrfti greinilega að vera vinna fyrir fleiri áfanga, sumaráfanga eða eitthvað.

Til að létta mér lundina fór ég á Nauthól áðan og hitti þar samnemendur mína úr Háskólanum en nokkrir þeirra voru að ljúka við prófin sín í dag og ákváðum við að hittast og spjalla. Það var góð upplyfting og þá er ég sem sagt tilbúin til að halda áfram að vinna að lokaverkefninu núna í kvöld.

2003-05-13T00:45:00.000Z

Setið við
Nú er komið miðnætti og ég hef setið mikið við í dag við lokaverkefnið. Þetta er drjúg vinna að setja saman leiðbeiningar og sýnishorn og sýnist mér þetta vera að komast á lokastig. Ég þarf að útbúa nokkuð góðar leiðbeiningar með uppsetningu á ritgerðum og hafa þetta allt tengt í gegnum vefleiðangurinn. Útlitið er komið og allt sem þarf, aðeins þarf að vinna áfram í leiðbeiningunum og sýnishornunum. Ég held ég setji ekki tengingu í vefinn fyrr en leiðbeiningarnar eru komnar á betri veg og vona að ekki verði langt í það. Síðan tengjum við Ólöf þetta allt saman við annan vefleiðangur um letur og umbrot og kennslusíður um uppsetningu á bæklingi og fleiru. Við vinnum þetta saman allt í bland og vitum varla orðið hvor vinnu hvað og erum þvers og kruss í samvinnunni. Okkur hentar reyndar mjög vel að vinna saman og vonum að útkoman verði viðunandi.

2003-05-11T22:34:00.000Z

Verkefnavinna
Nú er ég búin að sitja við í dag við lokaverkefnið og mér finnist ég hafa gert ansi mikið þá virðist alltaf vera töluvert eftir. Það eru svo miklir möguleikar á framsetningu á ritgerðarvinnu og leiðbeiningum þar að lútandi en ég tel að þetta eigi eftir að gagnast mörgum, þar hefur Sigríður Guðna alveg rétt fyrir sér. Mér finnst líka nauðsynlegt að hafa upplýsingar eins og hún og Þórunn eru að setja fram, um Þorlákshöfn og Háaleitishverfið, aðgengilegar á Netinu.

Ég vakti nú lengi fram eftir í gær til að fylgjast með kosningaúrslitum, það var orðið ansi hreint spennandi í lokin þó ég hefði kosið að þau yrðu örlítið öðru vísi en kom á daginn.

2003-05-09T21:38:00.000Z

Frídagur
Í dag hef ég ekki unnið mikið í verkefnum í tölvunni. Eftir miklar setur yfir bókum fór ég á stjá og sinnti ýmsum erindum sem höfðu setið á hakanum. Það tók sinn tíma og svo eyddi ég dágóðum tíma í að tala við fólk og spjalla, hef ekki gefið mér tíma í það í nokkurn tíma. En strax á morgun mun lokatörnin hefjast og ég hef nú ekki áhyggjur af því að takmarkinu verði ekki náð heldur hef ég meiri áhyggjur af því að við Ólöf náum ekki að takmarka okkur. Þegar maður er kominn vel á veg með þessi vefverkefni þá er ótrúlega gaman að halda þeim áfram, þróa þau, víkka þau út og bæta við, endalaussssssst!! Þetta er nú eftir allt svo fjári skemmtilegt, annars væri maður ekki búinn að endast í þessu svona lengi.

2003-05-08T19:43:00.000Z

Prófi 2 lokið
Mikið er nú gott að vera búin með þessi blessuðu skriflegu próf, utanaðbókarlærdóm og allt í kringum það. Mikill léttir og mér gekk bara alveg þokkalega vel í bókmenntunum þó ég viti að eitthvað hafi vantað. Vona það allavega. Lokaverkefnið í þessum áfanga er komið vel af stað, hefur tekið miklum breytingum og erum við Ólöf að hugsa um að tengja það vefleiðöngrunum okkar. Það er nú samt töluvert á leiðarenda og sé ekki fram á annað að þurfa einhvern frest þar sem Ólöf þarf að leggjast inn á spítala í næstu viku í nokkra daga. Vona nú samt að það dragist ekki mjög á langinn hjá okkur að ná að ljúka. Svo þarf að snurfusa ýmislegt og ýmsar síður, dytta að.

Nú mun ég taka hressilega til fóta minna og ganga mér til heilsubótar og vinna upp þessa undanfarna daga sem ég hef ekki gefið mér til göngu.

2003-05-06T23:54:00.000Z

Hveiti og bakstur
Já, það gæti verið sniðugt að fá Ingólf, bakarameistarann sjálfan, til að skera upp úr um hveitimálin. Ég er sammmála Gerði og Siggu Guðna um að hafa heyrt að Pillsbury Best sé það besta en hef reyndar ekki hugmynd um hvaða tegund er best. Ef ég ætla að baka eitthvað verulega fínt og fyrir veislur þá er það nú svo að ég kaupi Pillsbury tegundina. Skyldu það vera auglýsingarnar sem virka á mig eða hvað? Talandi um bakstur þá er það vert að skoða uppskrifta- og kökuvefinn hjá Hallgrími, gómsætar skúffukökur og brownies.

Ég leit upp úr prófalestrinum um sexleytið og fór við opnun nýja Nordica hótelsins, gömlu Hótel Esju, ásamt Ólöfu. Þar var margt um manninn og haldnar ræður og fleira og svo var boðið upp á líka þennan fína pinnamat, verulega góðan. Þar af leiðandi varð ekkert um eldamennsku á mínu heimili þennan daginn.

2003-05-06T10:41:00.000Z

Snjókoma
Þegar ég vankaði í morgun var snjókoma. Þar sem ég þarf að sitja inni við lestur truflaði það mig eiginlega ekki neitt, fór í mitt lestrarhorn og byrjaði. Sit þar enn og mun gera í allan dag og vona í lengstu lög að enginn trufli mig. Það þarf nefnilega ekki mikið til núna.

2003-05-05T14:39:00.000Z

Sjálfstætt fólk
Nú í dag hefur ég tekið til við lestur um Halldór Laxnes, rithöfundarferil hans og helstu ritverk með áherslu á Sjálfstætt fólk. Næsta próf hjá mér er á fimmtudag og eru bókmenntir síðari alda eins og þær leggja sig til prófs. Ég vona að ég komist yfir allt þetta efni og ef ekki verður bara svo að vera. Þá tekur við að koma frá lokaverkefni og að dytta að öllum hinum síðunum ... Ekkert smá verk!

Fór í góða göngu í gær í kuldanum og bjó mig bara vel svo það var í góðu lagi. Síðan var eldaður góður matur um kvöldið sem var etinn af mikilli lyst af okkur hjónunum, syni okkar og móður minni. Horfði svo á Silfur Egils í gærkvöldi og ég er nú orðin svolítið hissa á hve umræðan um kosningamál, og allt sem því fylgir, er lítil. Jú, það er rætt um kvótamál, sem er mjög þarft, en aðrar málefnalegar umræður eru ekki fyrirferðarmiklar. Ef svo er þá hefur það farið fram hjá mér í prófalestrinum. Ég er nú samt sem áður með mann hér á heimilinu sem sér um að uppfæra mig um þessi mál. Alveg ótrúlegt og svona stutt í kosningar!

2003-05-03T14:35:00.000Z

Prófi lokið
Jæja, þá er ég búin að fara í prófið í forníslenskunni og frændtungunum í Háskóla Íslands. Þetta var tveggja tíma próf í morgun og var 60% af heildareinkunn, hin 40% voru verkefnavinna. Þetta var mjög skemmtilegur málfræðiáfangi og kennarinn, Haraldur Bernharðsson, var mjög góður og gerði þetta að skemmtilegu fagi. Bókin sem lesin var heitir "Old English and its closest relatives. Survey of the Earliest Germanic Languages", eftir Orrin W. Robinson. Fyrir þá sem hafa gaman að málvísindum og germanskri samanburðarmálfræði er þetta mjög aðgengileg og læsileg bók.

Þar sem ég svaf ekki nema í fjóra tíma í nótt verður ekki mikið gagn af mér í dag til neins annars en að slæpast. Held það væri gott að leggja sig og fara síðan í göngu. Veðrið er vel til þess fallið þó það sé nokkuð kalt, en það er nú ekki það versta og er ég þar sammála Gerði sem segist ganga í hvaða veðri sem er, það þarf bara að búa sig eftir veðri.

Vona svo að öllum gangi nú vel að vinna yfir helgina.

2003-05-02T01:43:00.000Z

Kominn maí með kulda og trekk
Það sá að það var kominn snjór niður í miðjar hlíðar Esju þegar ég loksins fór út fyrir hússins dyr um kvöldmatarleytið. Það var kalt og hryssinglegt og einnig sást það vel á ræðumönnum við hátíðarhöldin í sjónvarpinu, þeir áttu í vandræðum með að hafa tök á ræðunum sínum. Hef ekkert getað unnið við tölvuna og ætla að reyna að vera róleg yfir því þar til á laugardag.

Maður fer ósjálfrátt að spá í gönguferðir eða mat þegar maður hefur lesið dagókina hjá Gerði. Ég held meira að segja að það hafi orðið til þess að ég ákvað að grilla nautafile sem var til í ísskápnum hjá mér. Bakaði kartöflur og lagaði með þessu salat og bernaise-sósu og heimilisfólkið var ekki óánægt með þessa frammistöðu hjá mér. Göngutúrinn verður hins vegar að bíða betri tíma og eiginlega flest annað.

Þegar ég ætlaði að skrifa í dagbókina um rétt fyrir miðnættið áðan var ekki nokkur leið að komast inn á vefsíðuna svo þessi póstur kemur örugglega fram 2. maí. Ég læt því þetta duga fyrir tvo daga í þetta sinn.

2003-04-30T19:16:00.000Z

Kvöldförðun í prófalestri
Nú gæti ég farið á ball eða eitthvað álíka eftir þessa líka svakalegu fínu kvöldförðun sem ég fékk hjá nemanda á snyrtibraut FB í dag. en það verður ekki því að heilsa, því þetta tók rúma næstum þrjá tíma í allt (þetta var próf) og ég verð að vinna upp tímann sem fór í þetta með því að lesa í kvöld í staðinn. Ég mun því fara öðru hvoru inn í stofu svo maðurinn minn geti notið „fegurðarinnar“, ballið verður að bíða.

Það hefur snjóað í dag og það passar við tímann, ég man ekki betur en að oft hafi snjóað í kröfugöngum 1. maí. Ég hef þó ekki farið í kröfugöngu í nokkur ár þó ekki sé vanþörf á að minna á hinna vinnandi stétt, á þessum síðustu og verstu tímum. Foreldrar mínir fóru iðulega í göngu enda mikið rætt um verkalýðs- og jafnréttismál á mínu heimili. Ég er illa svikin ef Baldur hefur ekki eitthvað pólitískt hjá sér á blogginu á morgun, hann er hefur áhuga á pólitík og það er oft gaman að lesa um það hjá honum. Annars er gott að geta þá kíkt á 1. maí vefinn hjá Salvöru.

Ég er búin að ná því að blogga á hverjum degi ansi lengi. Þegar þetta er orðinn fastur punktur þá fara að slæðast með alls konar hugleiðingar um allt milli himins og jarðar. Ég er búin að átta mig á því að sumir lesa bloggið og þá er ekki lengur eins og maður sé sleitulaust að tala við sjálfan sig eins og mér fannst fyrst þegar ég byrjaði á vefdagbókinni. Kannski er þá tilganginum náð. Ég hef aldrei verið mikil dagbókarkona en þetta er bara orðið allt í lagi. En nú þarf ég að snúa mér að germönsku samanburðarmálfræðinni, gotneskunni og fornenskunni fyrir prófið næsta laugardag. Þá á ég eftir að fara í fornsaxnesku og fornháþýsku föstudag. Ég veit ekki hvar þetta endar með mig, ég verð orðin mjög forn, gott að hafa tölvurnar til að ná í nútímann.

2003-04-29T10:56:00.000Z

Að líta í kringum sig og hugsa tilbaka
Þar sem ég sit og reyni að lesa fyrir próf er ýmislegt sem truflar mig þegar áhuginn er að dofna. Ég tók t.d. það ráð, mér til afþreyingar, að renna yfir blogg hjá samnemendum, greinilega eins og fleiri, og það eru skemmtilegar vangaveltur hjá Gerði um umhverfið og fyrri tíma. Ég man þá tíma að brunnklukkur voru á stjái í gömlu sundlaugunum í Laugardalnum og maður þurfti að vara sig þar!! Það truflaði mann nú samt ekki mikið því sem krakkigisti maður næstum í laugunum, maður var næstum kominn með sundfit.
Enn þann dag í dag finnst mér gott að vera í sundi, fer reglulega, syndi, fer í gufuna og heita pottinn og stend mjög lengi undir sturtunni. Maður endurnýjast og frískast. Það væri kannski ráð að drífa sig núna, verð örugglega ferskari við próflesturinn á eftir.

2003-04-28T14:11:00.000Z

Áfram lestur - germönsk samanburðarmálfræði
Nú eru það forníslenskan og frændtungurnar sem eru lesin fram að prófinu á laugardag. Allt annað bíður á meðan.

2003-04-27T17:54:00.000Z

Meiri lestur
Held áfram lestri. Smellti mér samt til Njarðvíkur í morgunkaffi til einnar sem kennir við Fjölbrautarskólann þar og ætlar að leggja fyrir okkur Ólöfu könnun á morgun. Þá ættum við að vera komnar með nógu margar úrlausnir til að geta unnið með í lokaverkefni.
Til ykkar sem eruð á opinni braut í KHÍ þá er komin inn á heimasíðu framhaldsdeildarinnar fundargerð frá námsnefndarfundinum frá því í mars sl.

2003-04-26T20:27:00.000Z

Langur göngutúr!
Eftir lestur í dag fór ég í langan göngutúr og skoðaði í leiðinni safnið hjá Orkustofnun í Elliðaárdalnum. Held áfram lestri í kvöld. Hafið það gott góðir hálsar.

2003-04-25T18:38:00.000Z

Próflestur áfram!
Já það er áfram próflestur. Fór í nudd í morgun hjá snyrtibrautinni í FB en þar var verklegt lokapróf. Það var notalegt. Hef síðan reynt að vera dugleg að lesa. Þetta eru þykkir doðrantar og ótal bækur. Vona að ég komist yfir þetta allt???

2003-04-24T09:48:00.000Z

Gleðilegt sumar allir!
Ég er sest við lestur bókmennta og verð að láta lokaverkefnið bíða í nokkra daga. Engin vandamál eru þar á ferðinni heldur þarf bara að hafa tíma til að ljúka því. Við Ólöf erum byrjaðar og komnar niður á verklagið og hvað á að taka fyrir, þ.e. leiðbeiningar við uppsetningu og frágang á ritgerðum og heimildum. Pósturinn frá Salvöru létti á hjarta mínu varðandi verkefnaskilin svo ég les áfram.

2003-04-23T17:38:00.000Z

Dagurinn í dag fór í að leggja spurningalista fyrir nemendur í FB vegna könnunar sem við Ólöf ætlum að vinna að í sumar. Vorum alveg á síðasta snúningi að leggja hana fyrir því skólum er alveg að ljúka og sumir þeirra byrjaðir með próf. En það tókst, reyndar eigum við eftir að fara í fleiri skóla. Þurfti að læra meira í dag en ég gerði og verð því líkast til að læra í allt kvöld. Hver mínúta skipulögð og ekkert má fara úrskeiðis. Það er greinilega búið að vera gott veður úti þó ég hafi ekki tekið eftir því fyrr en núna, klukkan að verða sex.

2003-04-22T09:24:00.000Z

Vorið er komið og grundirnar gróa ... Fallegt veður úti og ég inni að læra. Komin í gang með loka-lokaverkefnið. Til að geta unnið það í sumar þurftum við Ólöf að ná til nokkurra nemenda fyrir skólalok þannig að hafist var handa um páskahelgina við það. Vonast til að það gangi alveg upp því framhaldsskólarnir eru sumir hverjir komnir inn í próf og aðrir sem ná því eftir þessa viku. Náði nú rétt í þessu að setja inn myndasíðu með svipmyndum frá bútaklúbbnum mínum. Prófaði að búa til myndaalbúm í Dreamweaver og það var nokkuð auðvelt. Endilega skoðið myndirnar!!

Vona að allir séu í góðum gír með lokavinnuna.

2003-04-21T12:58:00.000Z

Kominn annar í páskum. Gleðilega páska allir! Nú verður maður að taka til hendinni. Ég hef ekkert unnið í tölvunni frá því ég bloggaði síðast. Danmerkurliðið mitt var að yfirgefa landið þannig að nú skapast smá tómarúm og kannski smá tími til að hefja lokasóknina að lokaverkefninu. Ég hef hins vegar náð að ljúka skriftum við ritgerð og lestur bókar fyrir bókmenntirnar. Enda fer að líða að prófum í HÍ og mikill lestur í bókmenntunum og frændtungunum. Allt annars konar lærdómur en við tölvuna.

2003-04-17T00:49:00.000Z

Fjölskyldan hefur tekið yfir hjá mér þessa dagana. Dóttirin og dótturdótturin frá Danmörku hafa haft vinninginn hjá mér þessa allra síðustu daga reyndar ásamt öllum hinum fjölskyldumeðlimum. Nú stend ég í eldamennsku næstum upp á hvern dag og býð ættmennum bæði á vinstri og hægri. Gott mál. Ég náði nú samt að sitja við núna í kvöld og lagfæra smávegis hjá mér ferilmöppuna og skilasíðuna og bæta við tengingum þar sem við átti. Þetta er endalaust dútl, en ekki samt leiðinlegt. Þetta virkar stundum á mig eins og að sitja við hannyrðir, afslappandi og notaleg vinna. Svo taka aftur við matarboð á föstudag og sunnudag og svo hverfa þær mæðgur til Danmerkur á mánudag. Alltaf gaman að fá þær í heimsókn, þó betra væri nú að hafa þær hér á landi.
Ég er nú loksins farin að sjá til loka þessa námskeiðs og vona að lokaverkefnið verði okkur Ólöfu ekki of umfangsmikil vinna.

2003-04-14T13:58:00.000Z

Ég var í fermingarveislu í gær hjá syni vinkonu minnar, honum Yngva Birgi. Hún heitir Ragnhildur Konráðsdóttir og kennir í Háskólanum í Reykjavík. Þetta var mjög skemmtilegt og gaman að hitta fermingarbarnið og fólkið hans.
Þegar heim kom tók ég til við að ljúka við og er nú tilbúin með kennsluefnið á vefinn. Ég tók fyrir stærðfræðiritilinn Equation Editor, leiðbeiningar og verkefni. Ólöf tók fyrir fjölva og tækjaslár. Vonandi gagnast þetta einhverjum, en sjálfar getum við nýtt þetta í kennslunni. Þetta er mjög gott að kunna og geta notað. Þá er að halda áfram að lagfæra síðurnar samkvæmt ósk Salvarar. Þetta er gríðarleg dútl vinna. Nú hefi ég hugsað mér að sinna dóttur minni og dótturdóttur en þær eru staddar hér í páskafríi. Svo liggur fyrir ein ritgerð sem ég þarf að ljúka ekki seinna en á morgun. Hún á að fjalla um Grím Elliðagrím í sögunni Sælir eru einfaldir eftir Gunnar Gunnarsson. Ég er sko farin að setja verkefnin niður á hvern og einn klukkutíma til að sjá fram á að ljúka þessu öllu.

2003-04-12T20:47:00.000Z

Laugardagurinn fokinn út í veður og vind. Eitthvað varð okkur Ólöfu þó úr verki. Komum okkur niður á kennsluefni á veg og hvernig við skipuleggjum einn námsáfanga. Þett er heilmikil skipulagsvinna og handavinna við að koma þessu á nethæft form. Þá er að gera loka breytingar á síðunum og byrja á lokaverkefninu. Vonast til að það verði ekki mikið maus, púff!!!!!

2003-04-10T21:29:00.000Z

Fyrra degi í staðbundinni lotu í Kennó hjá Salvöru er lokið. Við vorum látin lesa inn á myndband textann sem á að fylgja glærunum inn í Microsoft Producer. Ég hafði ekki gert mér grein fyrir því að ég gæti ekki lesið upp af blöðunum, þurfti því að lesa af blöðunum í höndum Sigurbjargar og sá mest lítið. Ég hef grun um að ég þurfi að lesa þetta aftur upp á band og þá væri sniðugt að hafa smá leiðbeiningar með. Ég held ég reyni það áður en ég skila þessu verkefni af mér. Ætla nú að taka því rólega sem eftir lifir kvölds.

2003-04-10T00:40:00.000Z

Jæja, enn einu boðinu lokið hjá mér í þessari viku. Í kvöld voru það samstúdínur mínar sem hittumst. Við reynum að gera það um það bil tvisvar á ári eða svo. Við hittumst hjá einni okkar og borðuðum góðan mat og sátum yfir honum í fjóra tíma. Mjög skemmtilegt. Nú er staðbundin lota hjá Salvöru á morgun og ég rétt að ljúka við glærurnar. Nú er meira áreiti hér á heimilinu en oft áður þar sem dóttir mín og barnabarn eru mættar á svæðið frá Danmörku. Það er nú alltaf gaman að fá þær og heilmikið þarf nú að stússast með þær þó afinn finni nú meira fyrir því en ég þar sem ég er hreinlega upptekin!!!!!!!

2003-04-08T10:53:00.000Z

Það er engin smá rigning á gluggunum núna, ekki að mér líki ekki rigningin, en þetta er ekkert smá. Ég sit því bara inni í dag og vinn. Annars eigum við hjónin von á dóttur okkar og dótturdóttur heim frá Danmörku í dag. Þær mæðgur ætla að vera hér hjá okkur yfir páskana. Þó dóttirin sé ánægð í Danaveldi sýnist mér hún þurfa að koma helst á fjögurra mánaða fresti í heimsókn.Þær fá aldeilis „fínt“ veður þegar þær mæta á klakann. Ég er svo að fara í boð seinna í dag í kanadíska sendiráðið, þar sem móttaka er fyrir kanadíska sagnaþulu sem er stödd hér á landi. Það verður vonandi skemmtilegt. Það er sko nóg að gera hjá mér í félagslífinu. Í gærkvöldi sat ég frá því kl. 18 og saumaði með bútasaumsklúbbnum sem ég er í. Ein okkar var með frábært snið að saumapoka, mjög fallegum. Ekki náðist að ljúka við hann og mun ég nú leggja hann til hliðar þar til allri verkefnavinnu verður lokið. Þetta eru alveg frábærar stundir og konurnar allar frábærar og góðir vinir að auki. Ekki nóg með þetta allt heldur ætlum við 10 samstúdínur úr Versló að hittast annað kvöld og borða saman. Við gerum þetta svona tvisvar á ári og náum að halda vel hópinn með þessu móti. Svo eru þær líka ágætar allar saman. Ég er nú búin að vera í saumaklúbb með 4 þeirra í bráðum 40 ár. Vona að það líði ekki yfir neinn. Svo hefði ég viljað mæta hjá Krisínu Steinars á föstudag en það er ekki enn komið á hreint hvort ég kemst. Vona það samt. Ég hlýt að vera nokkuð þjálfuð í samskiptum, mér finnst alveg hrillilega gaman að hitta fólk og vera í svona alls konar stússi. Svo finnst mér líka alveg rosalega gott að vera bara ein og dunda mér eitthvað. Nóg um sjálfa mig að sinni.

2003-04-07T13:50:00.000Z

Mér fannst ágætt að ljuka ýmsum verkefnum alveg eins og t.d. rannsóknina hjá Sólveigu. Það var mikill munur. Ég er að vinna í glærunum fyrir staðbundnu lotuna og á einungis eftir að flikka upp á útlitið. Ætla ekki að hafa þetta langt en þó eitthvað fræðandi. Svo er ég aðeins farin að velta fyrir mér lokaverkefninu. Ég er með ýmislegt í gangi en er ekki búin að ákveða hvað ég tek fyrir. Vona að mér takist að finna út úr því um helgina. Þessi vika er sú síðasta í Háskólanum og þá er komið að prófalestri þar. Þar með verð ég að fara að skipuleggja mig og ekkert múður.

2003-04-06T12:54:00.000Z

Settist við tölvuna núna, hafði ætlað í góðan göngutúr en ég held ég bíði smá stund og fylgist með hvort veðrið breytist ekki eitthvað, grenjandi rigning er ekki besta veðrið til göngu, þó ég láti nú fátt trufla mig ef ég ætla á annað borð að fara út.

Ég var góða stund niður í Kennó í gær. Frosti Heimisson var með aðstoðartíma í Mediator, margmiðlunarforriti, ansi hreint þægilegu og skemmtilegu. Á eftir að ljúka við eitt slíkt verkefni en þurfti upplýsingar um á hvaða formi ætti að vista myndbandsbút sem nota á inn í Mediator. Fékk svör og þá er eftir að ljúka við það verkefni.

Ég er núna alveg búin með rannsóknarverkefnið á vegum Sólveigar og mikið skelfing er ég fegin. Þá fer að fækka verkefnunum sem eftir eru í þessum áfanga. Í rannsókninni fylgdist með fjórum framhaldsskólanemum í tölvuveri þar sem frjáls tími var og þau unnu bæði verkefni samkvæmt skriflegum fyrirmælum í Word, leituðu á Netinu og bloggðu. Það fannst mér skemmtilegast að verða vitni að. Ekki bara að þau væru að blogga heldur eyddu þau töluverðum tíma í að lesa blogg hjá öðrum og höfðu skoðanir á því sem þar kom fram. Maður minn, og ég sem hélt að enginn læsi þetta blogg!!

Ég sjálf las hins vegar blogg frá nokkrum samnemendum mínum í KHÍ og rakst þá á grein sem Baldur McQueen Rafnsson vísar í á sínu bloggi og heitir Virðing fyrir tölvum og er eftir Þarvald Gylfason, prófessor í hagfræði. Greinin fjallar um OECD og menntamál, endilega lesið hana. Ég get tekið undir athugasemdir Baldur varðandi þetta málefni.

2003-04-05T11:33:00.000Z

Nú er ég mætt niður í Kennaraháskóla og ætla að vera hér í dag og vinna að hinum ýmsu verkefnun sem liggur á að ljúka. Er búin að vera að leita að greinum á bókasafninu og sé að ég þarf að leita betur að greinum sem ég ætla að nota í lesáfanganum sem ég er í. Það verður þægilegt að geta sest niður og bara lesið. Það er búinn að fara mikill tími í verklegt í Námi og kennslu á netinu og Margmiðlunina. Læt heyra meira frá mér á eftir þegar ég sé hvernig framvindan verður hér í Kennó.

2003-04-02T11:14:00.000Z

Gott að það er nú komið á hreint með glæruverkefnið fyrir staðbundnu lotuna um þar næstu helgi. Eins gott að þetta átti ekki að vera svaka fyrirlestur, þá hefði ég ekki náð að vinna ritgerð í bókmenntunum. En ég er búin að ljúka við rannsóknarhlutann hjá Sólveigu nöfnu minni, er búin að senda inn öll gögnin, kóðunina og allt sem því fylgir. Á þá eftir að senda henni póst og smella mér í umræðu á vefborðinu. Spjallaði aðeins á vefborðinu um vélritunarkennslu og nauðsyn hennar fyrir allan grunn í tölvunotkun og upplýsingatækni. Það væri orðum aukið að fara að ræða það hér líka, er alltaf að tönglast á þessu, mér finnst þetta gífurlega mikilvægt. Mér sýnist sem fleiri séu að komast á þessa skoðun, einkum ef tölvan á að nýtast nemendum eitthvað að gagni í námi og vinnu. En þá þarf að leggja grunninn vel í grunnskólanum. Annars verður erfiðara fyrir nemendur að ná réttri fingrasetningu og ná blindskriftinni. Ekki er langt síðan að það var hlegið að manni fyrir þessa skoðun en allt er í heiminum hverfult.

2003-04-01T19:23:00.000Z

Hvernig skyldi nú mannskapnum í námi og kennslu á netinu ganga með öll verkefnin sín. Þetta er ansi mikið að gera núna, ég hugsa ansi mikið um það núna. Á eftir að ljúka við greinargerð um rannsóknina hjá Sólveigu, búa til glærur fyrir staðbundnu lotuna hjá Salvöru, lagfæra hina ýmsu vefi því alltaf sér maður eitthvað sem maður vill bæta, glæruverkefnið í Microsoft Producer, og svo rúsínan í pylsuendanum, lokaverkefnið hjá Salvöru. Eru þetta ekki örugglega meira en 5 einingar sem þetta telur allt saman. Það sýnist mér ef talið er saman. En það borgar sig víst ekki að eyða tíma í svona hugsanir, þær bara tefja fyrir mér en fullvissa mig samt um að þetta sé eitthvað of mikið. Eins gott að það sé vor í lofti til að létta mér lundina fyrir þetta verkefnafár.

2003-03-30T20:05:00.000Z

Jæja þá þennan daginn. Ferming yfirstaðin og eftirlit með fjölskyldunni. Ég var að endurbæta hjá mér dönsku útgáfuna af Ut-fagmennskunni eða edb-fagligheden, það er endlaust hægt að eiga við þetta. Nú er ég að vinna í rannsókninni og þetta tekur allt mjög mikinn tíma. Sé ekki fram á að ná að ljúka við það fyrr en í vikunni. Ég er enn að velta fyrir mér hvað skal gera með glærur í staðbundnu lotunni. Það á að kynna margmiðlunarforritið frá Microsoft þá svo ekki á að vinna þær í því. Þetta þarf ég að kanna nánar. Mér finnst oft ansi mikið sem poppar upp á endaspretti í hinu ýmsu áföngum. Best væri ef maður vissi allt fyrirfram hvað ætti að gera svo ég gæti skipulagt mig betur hvað varðar að vinna verkefnin. Ég er með svo mikið á minni könnu að það er mér nauðsynlegt ef þetta á að hafast allt saman. Ég er búin að skipuleggja mikla vinnuviku í margmiðluninni í næstu viku, skrifa svo sem eina ritgerð og svo eru það verkefnin í íslensku máli að fornu og frændtungunum. Vona nú samt að ég drukkni ekki alveg þó það nálgist nú samt.

Ég gaf mér tíma í síðustu viku til að fara í bíó og sá myndina Nóa albínóa og einnig Hours. Báðar voru þær mjög góðar, sérstaklega sú íslenska. Ég mæli eindregið að sem flestir fari og sjái hana. Það er langt síðan ég hef séð eins góða íslenska mynd. Ég náði einnig að skoða myndbandið sem sonur minn, Friðrik Guðmundsson og Eggert Skúlason, gáfu út fyrir jólin, sem heitir Silungur á Íslandi. Þetta er vandað myndband um silungsveiði og þeir hafa báðir næmt auga fyrir náttúrunni í allri sinni mynd. Mæli með því fyrir þá sem hafa gaman að veiðimennsku. Fjölskyldan mín er dálítið mikið fyrir veiði, bæði lax- og silungsveiði, og farnar margar slíkar ferðir yfir sumarið.

2003-03-29T10:38:00.000Z

Nú sýnist mér sem allt sé komið á fullt hvað varðar verkefnaskil. Verkefni Láru eru frá og nú þarf að ljúka við rannsóknina hjá Sólveigu. Ég hef lokið við að fylgjast með 4 nemendum við vinnu á tölvu og taka viðtöl við þau og á eftir að vinna úr því. Mér sýnist sem það verði aðal vinnan við þessa rannsókn, setja þetta allt fram á frambærilegan og „réttan“ hátt. Þar sem að á dagskrá hjá mér þessa helgina er bæði fertugsafmæli og ferming það sýnist mér sem það verði ekki fræðilegur möguleiki á að ljúka þessu verkefni þessa helgi. Ég mun nú samt reyna að komast sem lengst með þetta því best er að það sé frá. Önnur og fleiri verkefni bíða handan við hornið.

Það er alveg rosalega fallegt veður úti þennan morguninn, snjór yfir öllu og sólin skín, nákvæmlega það sem mér finnst hafa vantað í vetur. Ég hlýt að hafa verið snjókarl í fyrra lífi, mér líkar svo vel við snjóinn. Ef til vill er það bara birtan sem veldur þessu, ég veit ekki. Hvað um það, ég er búin að fara í klippingu í morgun og átti að vera í talæfingu í dönsku til hádegis en tíminn féll niður. Þannig að ég er sest við að leysa verkefnin. Held ég verði samt að bregða mér út fyrir dyr og njóta dagsins í allri sinni dýrð, held meira segja að ég geri það bara núna. Strax.

2003-03-25T08:50:00.000Z

Páskahretið mætt í allri sinni fegurð. Mig hefur vantað snjóinn í allan vetur. Ég hef þá trú að ég hafi verið snjókarl einhvern tíma áður mér líkar svo vel við snjóinn. Kannski er það bara birtan sem mér líkar svo vel við eða mýktin.
Ég er nú búin að ljúka við verkefnin fyrir Láru og þá er rannsóknin eftir. Ég er búin aðv era að skoða vel hvernig maður ber sig að við svona könnun eins og þessa sem við eigum að vinna en ég fæ aðgang að mannskap á föstudaginn til að fylgjast með. Vona svo bara að mér takist að ljúka við skýrsluvinnuna sem þessu fylgir yfir helgina. Ég fer í fertugsafmæli á laugardag og fermingu á sunnudag svo þetta verður allt mjög knappt hjá mér. Það er alveg ótrúlegt hvað hleðst inn af alls kyns uppákomum þessa dagana!

2003-03-22T12:04:00.000Z

Í gær sótti ég ansi gott námskeið hjá Endurmenntun HÍ sem hét Liðsheildin og leiðtoginn. Jóhann Ingi Gunnarsson hélt þennan fyrirlestur og gerði það með sóma. Þetta var ekki nema 4 stunda fyrirlestur með góðu spjalli þar sem farið var yfir hagnýtar aðferðir til að skapa góða liðsheild og efla samstarfsvilja í fyrirtækjum og stofnunum (skólum). T.d. hvað einkennir samstillt lið kennara (félaga), hvað einkennir góða leiðtoga og ekki síst hvað einkennir hurgarfar liðsmanna í árangursríkri liðsheild? Einnig var farið í mikilvægi starfshvatningar. Jóhanni er lagið að hræra upp í fólki, fá fram viðbrögð og ná að spjalla um það sem hann veltir upp. Þetta voru allt kennarar sem sóttu námskeiðið og voru ekki færri en 30 manns sem mættu. Jóhann byrjaði á því að tala um tilfinningagreindina og tilfinningalæsið og kom inn á samskiptahæfnina og sjálfstraustið.

Þetta fór allt saman við það sem Erla Kristjánsdóttir kemur mikið inn á í námskeiðinu sínu „Nám og kennsla við aldahvörf“ sem boðið er upp á í framhaldsdeild KHÍ ég lauk fyrir áramót. Námskeiðið hjá Erlu var mjög gott og ég hvet alla í framhaldsdeildinni til að taka það sem hluta af sínu námi.

2003-03-19T00:39:00.000Z

Nú kemst ég loksins til að blogga dálítið. Var að vinna í allan dag, síðan var það germanska samanburðarmálfræðin og síðan fór ég á aðal-stofnfund Auðar-kvenna sem er félagsskapur kvenna sem hafa sótt frumkvöðlanámskeiðin í Háskólanum í Reykjavík. Það voru alls 163 konur sem tóku þátt í þessum námskeiðum og nú á að halda tengslunum við með því að halda úti félagi. Þetta var mjög þarft og mjög skemmtilegur og þarfur félagsskapur kvenna sem hafa stofnað eða hafa hug á að stofna sitt eigið fyrirtæki. Hver veit hvað gerist þegar þessu námi hjá mér lýkur, þá næ ég kannsi að koma fyrirtækjahugmyndinni á koppinn, hver veit.

Ég er að koma saman hugrenningum um upplýsingatæknina og mig, sem notanda og fagmann og ég mun smella á það tengingu á morgun, er orðin of þreytt núna.

2003-03-17T19:22:00.000Z

Dagur að kveldi kominn. Var á fundi í dag með námsnefnd fyrir brautina Uppeldis- og menntunarfræði sem ég er skráð á. Góður vettvangur til að koma á framfæri ýmsu er varðar brautina. Áætlað er að hafa fundi einu sinni í mánuði, klukkutíma í senn. Ég kann því vel að hafa oftar stutta fundi og vel skipulagða heldur en sjaldan og langa. Síðan þarf að huga að lokaverkefni fyrir upplýsingatæknina fyrir haustið. Þetta verður ansi töff, en ágætt. Nú þarf ég að nota morgundaginn og miðvikudaginn til að ljúka við verkefnið um mig sem UT-fagmann á tveimur tungumálum og þar næst er það könnunin á 4 nemendum í tölvuvinnu. Ég held að það muni taka ansi mikinn tíma að skrá allar upplýsingar um fjóra nemendur, gæti trúað að það tæki heila viku, alla vega líst mér þannig á það dæmi. Mér er ekki til setunnar boðið að halda áfram.
Mér finnst ég heyra lítið frá öðrum nemendum þessa dagana, litlar umræður á vefborðinu en ég vona bara að allt sé í góðum gír.

2003-03-16T22:53:00.000Z

Já, nú er þessari löngu helgi að ljúka og staðbundinni lotu í Margmiðlun til náms og kennslu. Eftir hádegið í gær var kennsla hjá Karli Jeppesen um myndatökur og klippingu á slíku stafrænu efni. Mjög fróðlegt og skemmtilegt einkum þar sem þetta er svið sem ég hef ekkert verið inni á. Í dag var að auki boðið upp á frekari vinnu hjá Braga í Flashi og var það vel en Bragi er sérfræðingur í þessu forriti. Þetta gagnast manni ekki einungis í margmiðlunaráfanganum heldur líka hjá Salvöru. Margar flugur slegnar í einu höggi.

Seinni partinn í dag var síðan tekinn með fjölskyldunni, það er ekki hægt að sleppa henni alveg þó það nálgist það stundum. Læt þetta duga í bili.

2003-03-15T12:33:00.000Z

Nú er ég stödd í Kennó í staðbundinni lotu í áfanganum Margmiðlun til náms og kennslu. N'u rétt í þessu var að ljúka fyrirlestur um hljóð og hljóðvinnslu hjá Hilmari Þórðarsyni frá Listaháskólanum. Mjög skemmtilegt og fróðlegt að kynnast þessu og sjá hvað hægt er að gera í hljóðvinnslunni. Erum búin að hlusta á Hilmar og prófa sjálf í ýmsum forritum síðan kl. 8:30 í morgun. Eftir hádegi verður fyrirlestur um hvernig hægt er að klippa til myndbönd og allt er að því lítur. Segi ykkur meira frá því eftir hádegið.

2003-03-14T19:44:00.000Z

Þetta var langur dagur í dag. Mæti alltaf í Háskólann frá kl. 8-10 á föstudögum, síðan var verkefnavinna til kl. 11 og þá brenndi ég upp í Kennó því þar er ég í staðbundinni lotu í Margmiðlun til náms og kennslu bæði í dag og á morgun. Það er dálítið lýjandi að sitja við tölvu stanslaust í tvo daga, en þetta er samt mjög áhugavert sem verið er að kynna fyrir okkur og kemur sér vel fyrir mig sem kennara í tölvum. Svo það verður stanslaus verkefnavinna hjá mér alveg fram í maí, svo sýnist mér.

Þriðja afmælið í minni fjölskyldu í mars er ekki fyrr en á mánudag. Þá á dóttir mín afmæli, verður víst 32 ára (hún er yngst). Strákarnir mínir sem eru eldri eru báðir búnir að eiga afmæli núna í mars. Svo það er sem sagt eiginmaðurinn sem er þarnæstur um þarnæstu helgi. Oft hefur mér fundist leiðindaveður í afmælishrynunni, það er nú eitthvað annað núna, blíðskaparveður alla daga, enginn snjór (svo telja megi) og frábært útivistarveður. Ég held ég smelli mér bara í göngutúr núna og læt heyra frá mér síðar.

2003-03-14T00:30:00.000Z

Ég held mér sé að takast hið ómögulega núna rétt í þessu, þ.e. að skila greinargerðinni til Láru á réttum tíma. Ég sá þetta ekki fyrir snemma í morgun. Ég er nefnilega í smá aukavinnu þessa dagana og hef því lítinn tíma aflögu, en samt ... Ég set hér slóð í greinargerðina en læt hana samt fylgja með hér í dagbókinni. Lára ræður þá hvort hún les þetta hér eða á vefnum hjá mér þar sem greinargerðin er staðsett. Hafið það öll svo gott um helgina.

UT2003, ráðstefna um upplýsingatækni í skólastarfi,
haldin í Verkmenntaskólanum á Akureyri 28. febrúar – 1. mars 2003 sl.

Árleg ráðstefna um upplýsingatækni í skólastarfi var haldin 28. febrúar til 1. mars sl. í Verkmenntaskólanum á Akureyri undir slagorðinu: "Er ekki kominn tími til ..., að byggja á reynslunni ..., að allir njóti tækifæranna ..., að taka til hendinni". Fyrri dagur ráðstefnunnar hófst á tónlistaratriði sem nemendur úr Menntaskólanum á Akureyri fluttu, næst bauð Hjalti Jón Sveinsson, skólameistari Verkmenntaskólans, gesti velkomna og að því loknu setti menntamálaráðherra ráðstefnuna.

Fjölmargt var í boði, s.s. fyrirlestrar, málstofur og sýnistofur og kynntu fyrirtæki og stofnanir ýmislegt er lýtur að upplýsingatækni í skólastarfi. Úr vöndu var að ráða hvað skyldi hlusta á og skoða en hvert atriði stóð yfir í um 50 mínútur og svo 10 mínútna frímínútur. Ekki var um neinar endurtekningar á fyrirlestrum og málstofum og fannst mér það töluverður galli þar sem margt áhugavert var í gangi á sama tíma. Að auki var takmarkaður þátttakendafjöldi í málstofum og þrátt fyrir að vera skráður á þátttökulista var ekki alltaf hægt að komast að og fannst mér það miður.

Konur og tölvunarfræði
Hrafn Loftsson, deildarforseti í tölvunardeild Háskólans í Reykjavík, fjallaði um konur og tölvunarfræði í sínum fyrirlestri. Þetta var athyglisverður fyrirlestur og mörgum spurningum velt upp, m.a. hvers vegna miklu færri konur leggja stund á tölvunarfræði en karlar. Fram kom að nauðsynlegt væri að gera eitthvað róttækt til að snúa þessari þróun við og fá konur til að sækja námið í þessum fræðum. Háskólinn í Reykjavík hefur hug á að að kynna fagið og námið betur og jafnvel breyta námsefninu þannig að konur telji það áhugavert að stunda slíkt nám. Það finnst mér reyndar mjög jákvætt en er ekki viss um að það eitt dugi til að konur mæti á svæðið. Það er í raun rannsóknarefni af hverju konur hafa ekki áhuga á tölvunarfræðum og gæti það e.t.v. stafað af framsetningu námsefnisins og kynningu á faginu. Kostir þessa fyrirlesturs var nú m.a. það að karlmenn eru að velta þessum málum fyrir sér og svo var virkilega gaman að hlusta á Hrafn en hann náði vel til þeirra sem sátu fyrirlesturinn. Vona að þeim takist að fá fleiri konur í tölvunarfræðina; stundum breytist takturinn þegar konurnar fjölmenna.

Tölvur og vísindaiðkun barna
Í sýnistofu hlustaði ég á kynningu sem Arnar Yngvason, deildarstjóri á Leikskólanum Iðavelli á Akureyri og leikskólastjórinn Kristlaug sáu um. Þau kynntu og sögðu frá tækninni sem þar notuð er í námi og kennslu leikskólabarnanna en á Iðavelli hefur tölvan verið notuð frá árinu 1998. Þau sýndu m.a. notkun tölvusmásjár sem er tengd við tölvu og skjávarpa. Smásjáin er í raun bæði víðsjá og smásjá og hægt að nota á margvíslegan hátt; taka og skoða kyrr- og hreyfimyndir, skoða skordýr og einnig er hægt tengja hljóðgervil við tölvuna. Skemmtilegast fannst mér að sjá hvað hægt er vinna að fræðslu í náttúru- og dýrafræði. Arnar sýndi hvernig þessi tæki voru notuð til að skoða skordýr og fleira og er ekki að efa að það gagnist börnunum og það þau eigi eftir að hafa gaman að. Það er hægt að ímynda sér að svona tæki sé hægt að nota í neðstu bekkjum grunnskóla ekki síður en í leikskólanum. Ekki síður var gaman að sjá hvað Arnar og Kristlaug höfðu gaman að því að kynna þessi tæki og tól og töldu mikinn hag af þeim fyrir bæði börnin og leikskólann en leikskólakennararnir á Iðavelli vinna með tölvur á leikskólanum eftir hugmyndum Carsten Jessen en krydda með sínum eigin hugmyndum og vinnubrögðum sem hafa þróast í gegnum tíðina. Þessi fyrirlestur gaf mér innsýn í annað skólastig en ég vinn á sjálf og það er alltaf jákvætt að vita hvernig unnið er með tölvur á öðrum stigum í skólakerfinu.

Ég fann fátt athugavert við þessa fyrirlestra, kannski ég sé bara svona jákvæð. Að lokum vil ég endilega að það komi fram að það sem mér finnst oft mjög gagnlegt við svona samkomur eins og þessa ráðstefnu er að hitta aðra kennara í faginu og spjalla við þá um allt mögulegt er viðkemur kennslunni. Það skilar mér alltaf miklu og maður heyrir og sér hvað aðrir eru að gera. Þannig að spjallið á göngunum og yfir kaffibollanum virkaði þarna eins og ávallt áður, þ.e. mjög vel.

2003-03-12T00:57:00.000Z

Nú er ég alveg að ná því að ljúka við greinargerðina um UT 2003 fyrir Láru, ætla samt ekki að tengja við hana fyrr en á morgun. Það hefur verið mikið að gera hjá mér í tvo daga, er að leysa af í vinnu í nokkra daga svo ég hef aðeins minni tíma í námið. Svo er nóg að gera í afmælisboðum þennan mánuðinn. Börnin mín þrjú og maðurinn minn eiga nefnilega öll afmæli í mars, vika á milli þeirra allra, svo það er kaffi einu sinni í viku allan mars. Mjög skemmtilegt. Núna eru tvö frá, það var 1. og 9. mars, og tvö eftir, þ.e. 17. og 23. mars Þetta er allt orðið rígfullorðið hjá mér svo það er einungis eitt afmælisboð sem stendur upp á mig að sjá um. Vonandi tekst mér að ljúka verkefnum fyrir Láru á réttum tíma.

Ég var að lesa áðan frétt frá fænda mínum einum, jafngömlum mér, og konu hans. Ég fæ senda pistla frá þeim þar sem þau eru við siglingar á Miðjarðarhafinu og hafa verið síðan í haust. Það er farið að vora nálægt Róm þar sem þau eru stödd núna.Tölvupósturinn er alveg dásamlegur til að fylgjast með þeim og heyra frá. Ég er búin að fá boð um að mæta í skútuna hvenær sem er, sé samt ekki að tími sé í það þessa mánuði sem í hönd fara, púff!!

2003-03-08T09:58:00.000Z

Þetta var langur dagur í gær mér. Ég er alltaf í tímum milli 8 og 10 og svo var einnig að ljúka löngu námskeiði sem ég er búin að sitja alveg síðan í haust. Það heitir Nám fyrir fartölvuleiðtoga og Ásrún Matthíasdóttir hefur séð um það. Þetta er búið að vera gott námskeið þar sem farið hefur verið í gegnum allt mögulegt er varðar fartölvur, kennslulega og tæknilega séð. Dagurinn í gær var sem sagt lokadagurinn og hóft kl. 9 með fyrirlestri um höfundarétt, síðan var Hlynur úr Borgarholtsskóla með pistil um myndvinnslu, þar næst Salvör okkar sem kynnti námið okkar og bloggið. Hún þótti mjög góð. Björg námsráðgjafi úr Háskólanum í Reykjavík mætti eftir hádegið og talaði um samskipti og mikilvægi þeirra, síðan uppfræddi Sverrir Páll úr MA okkur um ýmislegt um fartölvukennsluna þar og að lokum mætti Jóna Páls úr ráðuneytinu í spjall. Síðan tók við verkefnavinna fram undir miðnætti hjá Ásrúnu í Hafnarfirðinum. Þetta var góður námskeiðsdagur og vel heppnaður og ég dálítið þreytt núna.

Í fyrravetur sótti ég undirbúningsnámskeið fyrir þetta námskeið sem hét Dreifmennt. Það var einnig undir stjórn Ásrúnar. Ásrúnu tekst vel að skanna hvað það er hverju sinni sem þörf er að koma á framfæri við kennara sem eru að vinna við og með tölvugeirann í kennslunni. Árið þar á undan sótti ég álíka langt námskeið sem hét Nám fyrir fjarkennara þar sem farið var í gegnum kennslufræði fjarkennslunnar og ýmislegt henni tengt. Alltaf telur maður sig samt hafa þörf fyrir að fylgjast meira með. Það verður spennandi að vita af hvaða tagi næstu námskeið verða tengd þessu efni.

2003-03-06T21:47:00.000Z

Þetta er nú aldeilis góða veðrið hér á landi, kominn mars og enginn snjór, þó sýndist mér einhver veðurfræðingurinn vera að spá snjókomu. Það yrði kærkomið hjá mér. Ég sit hér nú og skrifa athugasemdir um fyrirlestrana á UT-ráðstefnunni og reyna að koma því frá mér um helgina. Allt í góðum farveg hér á bæ :-)

2003-03-05T23:48:00.000Z

Jæja, þá er ég byrjuð að vinna að kynningum á tveimur fyrirlestrum frá UT- ráðstefnunni á Akureyri sem eiga að birtast hér. Lára Stefánsdóttir mun sjá um að lesa þetta yfir. Mér fannst ansi fróðlegt að hlusta á ´vangaveltur um fjarnámið í FÁ og VMA hjá þeim Sölva og Hjalta. Ég held nú á endanum að spallið við alla hina sem maður hitti telji mest. Það er alltaf svo gaman að hitta aðra kennara frá hinum ýmsu skólum, heyra hvernig gengur, hvað er verið að gera o.s.frv. Ég held ég hafi það nú bara efst á listanum yfir það sem var áhugavert á ráðstefnunni.

Mér hefur ekki gengið nógu vel að ljúka við vefleiðangurinn eftir að ég kom að norðan. Ég hef svo sem haft nóg annað að gera og verð að reyna að vinna mig betur niður bunkann sem bíður eftir mér.

2003-03-05T09:04:00.000Z

Þetta er undarlegt með öll þessi verkefni sem hlaðast á mig. Ég hef ekki undan að ljúka þeim og það eru strax komin ný og stærri verkefni sem þarf að koma frá. Stundum finnst mér eins og þau liggi í leyni við næsta horn og skjótist svo fram næstum um leið og hægist um hjá mér. En ég læt það ekki á mig fá og renni mér í verkefnin og hef gaman af um leið og þau komast í höfn. Þetta eru sem sagt allt lærdómsdagar hjá mér og fjölbreytnin er gífurleg, allt frá bloggi og vefsíðum um hin ýmsu málefni til verkefna í bókmenntum og fornu máli. Allt jafn skemmtilegt. Og þar sem ég hef nóg að gera verð ég nú að einhenda mér í verkefnasúpuna. Nóg að sinni.

2003-03-03T00:02:00.000Z

Jæja, lesendur góðir. Nú er helginni að ljúka og UT-ráðstefnunni lokið. Dagurinn í dag fór í það að koma tölvunni hjá mér á réttan kjöl eftir að eitthvað fór úrskeiðis með skjákortið og tenginu í músargreyið. Þetta var erfitt, ég gat ekkert unnið, þurfti að sinna miklum lærdómi á ýmsum vígstöðvum, en loksins er þetta komið í lag.

Annars var ráðstefnan ágæt. Við vorum nokkrar saman í orlofsíbúð, mjög góðri, og fengum okkur bílaleigubíl svo við kæmumst þægilega á milli. Ég sótti nokkra fyrirlestra og sat í nokkrum málstofum, sumt áhugavert, annað ekki. Ég missti hins vegar af ýmsu vegna mikillar aðsóknar og án þess að ég áttaði mig á að ég þyrfti að skrá mig. Svo ég skráði mig en ekkert dugði. Hvað um það. Læt þetta duga í bili.

2003-02-27T10:45:00.000Z

Já, sest enn og aftur við og var ljúka smá verkefni í myndvinnslunni. Mér sýnist ég vera búin að ljúka við allt sem þarf að vera klárt fyrir 1. mars hjá Salvöru. Svo er bara að bæta við smátt og smátt og koma vefleiðangrinum í höfn í næstu viku. NÚ verð ég hins vegar að ljúka við að bókfæra reikninga fagfélagsins 3F, félags um upplýsingatækni og menntun þar sem aðalfundurinn verður á morgun. Ég verð að vona að þetta hafist allt fyrir norðurferðina.

2003-02-27T01:25:00.000Z

Já tíminn líður sem aldrei fyrr. Nú var ég að ljúka við smá lagfæringar á síðunum mínum og bætti við síðu um áhugamálin. Það á nú eftir að bætast eitthvað við þar en síðan er komin og er það vel. Hef setið við tölvuna í kvöld í alls kyns verkefnavinnu og læt þessu lokið að sinni. Það verða snör handtök á morgun við að koma öllu í kring fyrir norðurferðina snemma á föstudagsmorgun og vona ég að það takist allt saman. Vona ég að það viðri sæmilega á alla sem eru að fara norður. Það verður örugglega ansi fjölmennt á Akureyri þessa tvo daga. Segjum þetta þá gott í dag.

2003-02-24T13:45:00.000Z

Enn ný vika komin og ég sit hér enn og aftur. Mér tókst að koma ansi mörgum verkum frá um helgina þó ekki færi ég niður í Kennó. Ákvað á síðustu stundu að sitja við og ljúka ýmsu ógerðu sem og tókst. Ég bætti ýmsum síðum við skilasíðuna mína, tengdi í tæknisöguna og lagfærði ýmsar stillingar. Mér sýnist sem ég sé þá komin með flest sem þarf að vera á hreinu fyrir 1. mars nk. Vefleiðangurinn mun taka á uppsetningu og frágangi á ritgerðum þar á meðal hvernig frágangur heimilda skuli vera. Persónulegur verður einnig að vera klár og nú þegar er ég búin að setja krækjur í ferilsíðu með upplýsingum um menntun og störf. Þá sýnist mér kannski aðallega vanta e-ð um áhugamálin og fjölskylduna. Þetta kemur allt saman.

2003-02-21T14:18:00.000Z

Ég hef verið að reyna að koma því þannig fyrir að geta mætt á morgun niður í Kennó. Vona að það takist, þó ekki væri nema að hitta einhverja og spjalla við þá um gengi þeirra. Það er alltaf dálítið gott að sjá og heyra í öðrum. Mér hefur ekki tekist þetta síðastliðna laugardaga því það hefur alltaf eitthvað annað verið í gangi hjá mér. Ég lít björtum augum til næstu viku því þá sýnist mér skapast gott næði til setu við tölvuna. Eins og veðrið er núna er það tilvalið að sitja inni og puða. Rigningin bylur á rúðunum hjá mér og þvær þær vel og vandlega og sé betur út, allavega þegar veðrið skánar.

2003-02-19T18:00:00.000Z

Nú er ég sest við tölvuna og ætla að ná því takmarki í dag að ljúka ýmsum athugunum á vefsíðum og koma mér svo í það að ljúka við verkefni í margmiðlun, „flassa“ dálítið. Það kemur mér ekki bara til góða í margmiðluninni heldur einnig í „Námi og kennslu á netinu“ almennt. Ég sat í tíma áðan uppi í Háskóla hjá Sveini Yngva í bókmenntum síðari alda. Þó Sveinn sé að fara í 18. alda bókmenntir þessa stundina kom hann samt inn á „blogg“ nútímans. Hann er ansi hreint skemmtilegur kennari og nær mjög oft að tengja bókmenntir fyrri alda við nútímann, ber það saman og reynir að fá nemendur til að velta ýmsu fyrir sér. Aldursbreidd nemenda er reynar ansi mikil en það er bara betra. Það á að bjóða upp á áfanga næsta vetur sem á að fjalla um skáld-ævisögur á 20.–21. öld og ef ég man rétt á hann að heita „blogg, blogg“. Þetta er allt hægt að tengja saman, nema hvað.

Ég hef verið að velta fyrir mér efni vefleiðangurs og kemur margt til greina. Best þykir mér samt að hafa hann um eitthvað er tengist kennslu í upplýsingatækni og íslensku þó margt annað komi nú til greina. Þyrfti að fá tillögur frá ýmsum og þigg ég allar ábendingar.

Í kvöld ætla ég hins vegar að smella mér í bútasaumsklúbb. Konurnar sem ég hitti þar eru frábærar í þeim saumaskap og sköpunargleðin í hámarki. Það er enn allt önnur vídd en námið sem ég er í, hvort heldur sem er upp í KHÍ eða HÍ. Ég er ekki í vandræðum með tilbreytingu í lífinu, það verður seint af mér skafið.

2003-02-18T11:19:00.000Z

Nú er kominn snjór aftur, meiri birta úti, inni og í sinni. Fyrsta vefrallýið okkar Ólafar komið á vefinn og inn á verkefnasíðurnar okkar. Það fjallar um leit í leitarvélunum Gegni og Greini. Við urðum nefnilega verulega varar við það í könnun sem við framkvæmdum á haustönn meðal nemenda í framhaldsskóla (FB) varðandi þekkingu þeirra á upplýsingatækni og tölvunotkun að þeir höfðu flestir ekki hugmynd um hvað Gegnir og Greinir væri. Vonandi tekst okkur að bæta úr því þekkingarleysi þeirra með þessu vefrallýi. Næsta vefrallý lítur dagsins ljós von bráðar.

Og svo er ráð að skunda í tíma í forníslensku og frændtungunum (germönsk samanburðarmálfræði) sem er ágætt mótvægi við nútímann. Ég hrekk fram og tilbaka í tíma, heldur mér ágætlega við.

2003-02-16T20:05:00.000Z

Jæja, nú er langri helgi að ljúka hjá mér og enn og aftur vantar mig fleiri tíma í sólarhringinn. Allan daginn í gær sat ég ráðstefnu hjá Verzlunarskólanum sem var haldin á Þingvöllum. Mættum kl. 9 um morguninn og vorum komin í bæinn um kl. 21 í gærkvöldi. Þetta fór allt vel fram og vonandi verður gagn af ráðstefnunni fyrir skólann. Lilja M. Jónsdóttir, lektor við KHÍ, hélt langan og greinargóðan fyrirlestur um samþættingu námsgreina, þverfaglega kennslu, en skólinn ætlar að efla slíka kennslu í skólanum. Síðan var Thor nokkur með innlegg um mannleg samskipti og var það mjög gott. Eftir miklar umræður í hópum og greinargerðir á þeirra umræðum snæddum við öll verulega góðan málsverð og brunuðum síðan í bæinn. Þar með var manni öllum lokið og lítið fór fyrir námi mínu þann daginn.

Í dag átti að vera hið versta veður en ég hef lítið orðið vör við það, lægðin hlýtur að hafa smeygt sér fram hjá. Ég er ég búin að sitja við og föndra við ýmislegt á vefsíðunn minni, ljúka við vefrallý og ýmislegt fleira. Svo þarf nú líka að sinna fjölskyldunni og fleira. Nú ætla ég að vinda mér í það að senda inn skráningu á sumarnámskeiðin í KHÍ, ekki seinna vænna, umsóknarfresturinn rennur út um miðnættið. Ætti kannski að kíkja á Flashið fyrir Braga í Margmiðlunaráfanganum, má ekki gleyma því.

2003-02-11T23:23:00.000Z

Ágætu lesendur, nú þarf ég að fara að setja mig í startholurnar og setja krækju í mynd af mér, ekki seinna vænna. Heimasíðan er að fæðast og hef ég góðan tíma á morgun og fimmtudag til að koma henni inn á Ismenntarsvæðið mitt. Ég hef verið svo upptekin undanfarið í íslensku máli að fornu og frændtungunum uppi í HÍ. Þetta stendur allt til bóta. Bestu kveðjur.
Mér finnst ég alltaf þurfa að kveðja í vefdagbókinni, það er kannski bara tóm vitleysa að vera að því?? :-)

2003-02-10T18:19:00.000Z

Enn og aftur er verið að bæta við hjá sér, nú setti ég tengil í póstinn minn þannig að hægt er að senda póst beint af blogginu til mín.

2003-02-09T17:21:00.000Z

Nú er að sjá hvort ég hef náð mér eftir tilraunina með FTP????????? Ég vona svo sannarlega að þetta virki. Mér finnst ég vera búin að eyða of miklum tíma í þessar útlitsbreytingar og viðbætur hjá mér.
Kveðja, Sólveig

2003-02-09T14:16:00.000Z

Meira dútl - teljari og skilaboðaskjóða komin og vonandi virk.

2003-02-09T14:11:00.000Z

Hæ aftur

2003-02-09T14:09:00.000Z

Heil og sæl aftur.
Góður dagur í dag! Er að bæta við hjá mér krækjum í ýmsar síður og vonandi gengur það.

2003-02-05T22:22:00.000Z

Er að dútla við smáútlitsbreytingar og spennandi að sjá hvernig þær virka, ef þær þá virka!!

2003-02-05T22:04:00.000Z

Þetta er greinilega allt sjálfvirkt, auðvitað, auglýsingarnar horfnar sem dögg fyrir sólu.

2003-02-05T22:02:00.000Z

Jæja, nú er ég búin að senda ósk um að losna við auglýsingarnar af vefdagbókinni þessari og vona að það taki nú ekki langan tíma. Sjáum hvað setur.

2003-02-05T21:50:00.000Z

Heil og sæl. Gaman að loksins skuli kominn vetur, það liggur við að maður sé hættur að þekkja snjóinn. Mér finnst alltaf jafn skrýtið að setjast niður og skrifa í þessa dagbók, tala við sjálfa mig og hugleiða. Ég er svo sem vön að spjalla við sjálfa mig en ekki endilega setja það niður í texta og hafa hann aðgengilegan fyrir ansi marga?! Hvað um það, námið heldur áfram og ég sit við vefsmíðar á síðu fyrir skilaverkefnin hjá Salvöru. Er ekki enn komin með nýjasta hugbúnaðinn, er með útgáfu nr. 4 af Draumavefnum og læt það duga í bili. Þetta stendur allt til bóta. Sæl að sinni.

2003-02-02T19:45:00.000Z

Sæl öll í dag,
enn ný vika að byrja og er það nú gott. Ég gleymdi að það ætti að vera tenging í síðuna mína á vefsíðusvæðinu og bæti henni því við hér: Sólveig Friðriksdóttir. Í vikunni mun ég svo bæta við síðuna mína.
Sæl að sinni.

2003-01-31T23:35:00.000Z

Mér tókst loksins að setja inn eina síðu á vefsíðusvæðið mitt með ftp, síðan er að halda áfram með að smíða hana. Vefrallýið verður um leit í bókasafnsforritunum Gegni og Greini og höfum við Ólöf hug á að vinna það saman. Núna er Ólöf hins vegar að undirbúa afmæli sitt sem verður haldið upp á með pompi og prakt á morgun. Ég mun bæt við þetta hjá mér á sunnudaginn næst komandi. Sæl að sinni.

2003-01-29T22:39:00.000Z

Heil og sæl öll.
Ég var að reyna að skrá í vefdagbókina mína í morgun en eitthvað var ekki í lagi þá, allt virðist í fína lagi núna. Ég er byrjuð að vinna í vefsíðunni minni og er að byrja með vefrallý. Er með nokkrar hugmyndir sem ég er að velta fyrir mér en þarf að fínpússa. Læt þetta gott heita í dag og sendi ykkur kveðju.

2003-01-26T20:43:00.000Z

Sæl öll í dag.
Ágæta fólk, ég er Sólveig Friðriksdóttir, tölvukennari við Verzlunarskóla Íslands og er reyndar í námsleyfi þennan veturinn. Ég stunda nám við framhaldsdeildina í KHÍ og HÍ og er einnig að bæta við mig í íslensku í HÍ. Ég útskrifaðist frá Versló 1969 og sem kennari frá stúdentadeild KHÍ vorið 1971, kenndi við grunnskóla í átján ár og hef kennt við VÍ frá 1985. Ég er búin að kenna á tölvur frá því 1985, vá þetta er orðið ansi langur tími! Maðurinn minn heitir Guðmundur og ég á þrjú uppkomin börn og fjögur barnabörn. Tvö þeirra búa á Húsavík, eitt í Hollandi og það fjórða í Danmörku.

Tæknimálin hjá mér hafa alltaf verið í brennidepli, ef svo má segja. Ég hef kennt á tölvu frá 1986 og er búin að vera með tölvu u.þ.b. frá þeim tíma og hef notað tölvupóst síðan þá. Í skólanum hjá mér eru fimm kennslustofur með tölvum til að kenna í, allar nettengdar og allir, nemendur og starfsmenn, hafa aðgang að neti og pósti. Síðan eru nokkuð margar tölvur í vinnuaðstöðu kennara þó alltaf vanti fleiri. Það sem mér finnst helst vanta núna í skólanum eru fleiri fartölvur en kennarar verða sjálfir að kaupa sér fartölvur ef þeir hafa áhuga á því og svo að fleiri kennarar taki tæknina í sínar hendur.

Heima er ég ekki með hraðvirka tengingu og ekki sítengingu og finn dálítið fyrir því núna. Við notum Internetið töluvert en ekki mikið til að versla nema þá helst með flugfarmiða, erum með heimabanka en notum hann ekki alltaf. Ég er sjálf ekki með virka heimasíðu þó langt sé síðan ég bjó til slíkar síður. Ég bjó t.d. til eina heimasíðu um bútasaum fyrir ári síðan í einum áfanga í Háskólanum. Tölvupósturinn og önnur samskiptatæki eru hins vegar mikið notuð til að hafa samband við fjölskyldumeðlimi ekki síst þar sem þeir eru margir búsettir úti á landi og erlendis og segja má að samskiptin séu mikil á þann veginn en síminn samt notaður mikið líka.

Á heimilinu er til prentari, stafræn myndavél og upptökuvél, einkum notuð af eiginmanninum. Við hjónin erum bæði með GSM-síma þó maðurinn minn hafi verið með slíkan síma mun lengur en ég eða frá því að þeir komu fyrst á markaðinn. Þessir símar eru óspart notaðir og þar sem allir fjölskyldumeðlimir eru líka með þessa síma er auðvitað auðvelt að ná til þeirra á þann mátann. Svo virka þeir sem minnisbækur, símaskrá, klukka, vekjari o.fl.

Ég geri mér ekki alveg grein fyrir þróuninni framundan í öllum þessum tæknimálum en eitt er víst að hún er svo hröð að miklar breytingar eiga eftir að eiga sér stað á næstu 10 árum, s.s. þráðlausar tengingar á flest tækin hjá okkur og kostnaðurinn við þetta allt hlýtur að minnka, vonandi!!
Sæl að sinni.

2003-01-21T19:47:00.000Z

Sælir allir.
Jæja, þá er að halda áfram með námskeiðið, huga að norðurferð á UT2003, finna hugmynd að vefrallýi og athuga með skrif mín um tæknina á mínum vegum. Ég er búin að senda þeim hjá Ismennt beiðni um að aðgang að vefsvæðinu mínu og á von á að fá sent aðgangsorð og lykilorð sem allra fyrst. Þá get ég byrjað á að nýta mér vefsvæðið.
Ég var að fletta í gegnum vefdagbækurnar hjá þátttakendunum í námskeiðinu og ætla að bíða með að tengja (krækja) í þær þar til eitthvað bitastætt er komið þar inn. Annars hef ég nóg að lesa fyrir áfangana sem ég er í íslensku í Háskólanum, svo er skemmtilega kalt úti, loksins. Sæl að sinni.

2003-01-18T13:22:00.000Z

Sæl á blogginu.
Nú er bara að byrja að vinna leiðabókina hjá Salvöru. Í námskeiðinu hjá henni vorum við að útbúa okkur þessa bók og þetta er dagbókin mín. Ég er í nemandi í framhaldsdeild KHÍ.